Сунтаарбыт улууһугар эдэр педагогтар ассоциациялара тэриллэн үлэлээбитэ быйыл 10 сылын туолла. Бу сыллар тухары ассоциация араас хабааннаах үлэни ыытан кэллэ. Былырыыҥҥы слет Аллаҥа уонна Тойбохой нэһилиэктэригэр кииннээн ыытыллыбыт эбит буоллаҕына, быйылгы юбилейдаах сылга слет Элгээйигэ уонна Күндэйэҕэ буолла. Икки күннээх слет олунньу 29-кулун тутар 1 кк.буолла. Бу тэрээһиҥҥэ уопсайа Сунтаар улууһун 120 эдэр педагога кытынна.
Слет чэрчитинэн кэлбит педагогтарга биһиги музейбытыгар сэргэхситэр тургутук оонньуулар ыытылыннылар. Ол курдук, слет кыттыылаахтара түөрт хайысханан арахсан сэргэх тэрээһиннэргэ сырыттылар. Бастакы хамаанда Айылҕа музейын методиһа Г.С. Саввинова ыытааччылаах «Своя игра» толкуйдатар оонньууга билиилэрин холоннулар. Иккис бөлөх олус интэриэһинэй, буһуулаах-хатыылаах квест оонньууга сүүрдэ-көттө. Бу оонньууну эмиэ музейбыт үлэһиттэрэ директор А.С. Иванова, педүлэһиттэр С.Н. Прокопьева уонна О.М. Яковлева иилээтилэр-саҕалаатылар. Үһүс хамаанда кыттыылаахтара ЭРМЭК эбии үөрэхтээһин педагога С.М. Герасимова ыыппыт маастар кылааһыгар уонна таксидермист Г.Г.Гуляев маастар кылааhыгар сылдьан элбэххэ үөрэннилэр. Төрдүс хайысханан Кыайыы 75 сылыгар анаммыт тургутук оонньуу буолла. Бу тургутугу «Туойдаах Алаас» музей үлэһиттэрэ сэбиэдиссэй А.С. Игнатьева, методист М.И. Иванова ыыттылар.
Ити курдук слет чэрчитинэн биһиги музейбытыгар бэрт сэргэх тэрээһин буолан ааста. Түмүккэ кэлэн кыттыбыт эдэркээн педагогтарбытыгар туоһу суруктары туттардыбыт. Өрүүтүн бу курдук түмсүүлээх, көхтөөх, инникигэ дьулуурдаах буолуҥ диэн баҕа санаабытын этэбит.
Б.Н.Андреев аатынан Элгээйитээҕи ЭРМЭК.
| 