Быйылгы үөрэх дьылыгар хааччахтыыр эрэсиим харгыстаан, үөрэх дьылын өрөгөйдөөхтүк арыйыы үгэс курдук маассабайдык бэлиэтэммэккэ, дистанционнайдык ыытылынна. Маннык хааччахтыыр тэрээһининэн муҥурдаммакка, оскуолабыт сорох кылаастара, хамсыктан харыстыыр бары миэрэлэри тутуһан туран, үөрэх дьылын сэргэхтик саҕалаатылар.
Ол курдук, Элгээйи орто оскуолатын 7 б кылааһын үөрэнээччилэрэ (кылаас сал. Килясова Р.Н) Билии күнүгэр төрөөбүт дойдуларын историятын сырдатар "Туойдаах Алаас" түмэлгэ ыалдьыттаатылар. Бу сыл бэлиэтэнэр Аҕа дойду Улуу сэриитигэр Кыайыы өрөгөйдөөх үбүлүөйүн көрсө, кыайыыны уһансыбыт аймах дьоннорун туһунан ахтыылары түмэн, хаартыскалаан, дьэрэкээн иллюстрациялаан оҥорбут альбом-кинигэлэрин музейга бэлэх ууннулар. Сэриигэ кыттыбыт биир дойдулаахтарын туһунан түмэл салайааччыта Игнатьева А.Д. кэпсиирин болҕойо иһиттилэр, музейга экскурсиялаатылар. Историяны ытыктыыр, өбүгэлэринэн киэн туттар инники кэскилбитигэр - ытык ыччаттарбытыгар, оҕолору үтүөҕэ сирдиир кылаас салайааччытыгар музей үлэһиттэрэ махталбытын этэбит. |