Сунтаарбыт улууһун күнэ олус сэргэхтик ааста. Биһиги коллектив «ретро-стиль», ол эбэтэр урукку, сэбиэскэй кэм саҕанааҕы таҥаһы кэтэн-симэнэн, кырдьык даҕаны, ааспыт үйэҕэ төннүбүт курдук, Сунтаар улууһун күнүн үөрүүлээх аһыллыытыгар кытынныбыт. Дьүүллүүр сүбэ быһаарыытынан Элгээйи нэһилиэгэ нэһилиэктэр парааттарын кыайыылааҕа буоллубут.
 
Ону таһынан, Сунтаардааҕы үөрэх управлениятын көҕүлээһининэн оҕолорго уонна улахан дьоҥҥо култуура уонна сынньалаҥ пааркатыгар “Сэһэн түһүлгэҕэ” “ Мин сөбүлээн иитэр харамайым” диэн дьиэ кыылларын, харамайдарын күрэҕин тэрийэн ыыттыбыт.
Күрэххэ оҕолуун-улаханныын уопсайа 8 кыттааччы көхтөөх кыттыыны ылла. Ол курдук: Герасимова М.И. аатынан Сунтаардаа5ы санаторнай оскуола-интернат үөрэнээччилэрэ Аммосова Арина, (3 кылаас), Егоров Слава, (3 кылаас) уонна Егоров Ярик (4 кылаас), улитка, черепаха икки көрүҥүн; Николаева Айгыына, Сунтаар алыҥ сүһүөҕүн 2 кылааһын үөрэнээччитэ Ника диэн ааттаах иитийэх дьиэ хааһын; Түбэйтэн 2 кылаас үөрэнээччитэ Зедгенидзева Зарина, 11 саастаах Тетя Мотя черепахатын кытары; Сунтаартан Никифорова Айыына, шпитц боруодалаах Ральф диэн доҕорун кытта, ону тэҥэ улахан дьоҥҥо Дмитриева Лена Робертовна 5 ыйдарын туолбут коза оҕолорун, Федорова Мария Георгиевна 3 саастарын туолбут Ляля уонна Поля диэн икки мопс боруода ыттарынаан кэлэн көхтөөх кыттыыны ыллылар.
Доҕор оҥостубут иитэр харамайдарын аҕалан оҕо-аймах, дьон-сэргэ сэҥээриитин ылыан ыллылар. Билигин аҥардас ыты-куосканы эрэ буолбакка, араас экзотическай харамайдары дьон сөбүлээн иитэрин сэҥээрэ көрдүбүт. Кыракый дьиэтээҕи доҕотторбут сылаас сыһыаны, үөрүүнү бэлэхтээбиттэрэ киһини үөрдэр эрэ.
Ол курдук хас биирдии кыттааччыга анал аат иҥэрилиннэ, хаһаайыттарыгар сэмэй бэлэх туттарылынна.
  
Кириллина Кюнняй Григорьевна, эбии үөрэх педагога
|
